नेपाली कांग्रेसका नेता कृष्णप्रसाद सिटौलाले तीनकुने-कोटेश्वर-जडिबुटी क्षेत्रमा आगजनीबारे पूर्वराजा ज्ञानेन्द्र शाहको धारणा के हो भन्ने प्रश्न गरेका छन्।
शनिबार बिपी चिन्तन प्रतिष्ठानले काठमाडौंमा गरेको कार्यक्रममा बोल्दै सिटौलाले शुक्रबार भएको घटनाबारे पूर्व राजाको धारणा माग गरेका हुन्।
‘हिजो काठमाडौंको कोटेश्वर आसपासमा राजावादीहरुले जे हिंसात्मक र दु:खद घटना घटाए त्यसप्रति मेरो खेद छ,’ उनले भने, ‘घटना पूर्वराजा ज्ञानेन्द्र शाहको उक्साहटमा घटेको हो वा होइन? हो भने उहाँले जिम्मेवारी लिनुपर्छ, होइन भने त्यसको जबाफ दिनु पर्छ।´
पूर्व राजाले सरकारले दिएको सम्मान र सुरक्षाको ख्याल राख्नुपर्ने पनि उनले बताए।
‘पूर्व राजा ज्ञानेन्द्र पोखराबाट फर्कँदै गर्दा, एयरपोर्टबाट गौशाला हुँदै निर्मलनिवास जाँदै गर्दा जुनजुन कुराहरू उठान भएका छन्, त्यसको उपज हिजोको घटना हो भन्ने बुझिन्छ, उहाँको निवासमा प्रदर्शनको सञ्चालन र तयारीबारे केही बैठक र छलफल भएका कुरा पनि बाहिर आएका छन्,´ उनले भने।
उनले पूर्वराजा ज्ञानेन्द्रलाई राजाहुँदा जस्तै व्यवहार नदेखाउन आग्रहसमेत गरे।
`राजा हुँदा पनि जनता माथि आतंक, अन्तिम राजा भएका बेलामा पनि जनतामाथि आतंक?,´ सिटौलाको प्रश्न थियो।
उनले राजाहरूको पटकपटकको लोकतन्त्रमाथिको अतिक्रमणपछि गणतन्त्र आएको बताउँदै गणतन्त्र नउल्टिने पनि बताए।
`गणतन्त्र अहिलेको महान उपलब्धि हो, राजाहरूको पटकपटकको लोकतन्त्रमाथिको अतिक्रमण पछि गणतन्त्र आएको हो, लोकतन्त्र, गणतन्त्र, समानुपातिक समावेशी र संघीयता आजको महान उपलब्धि हो, यी उल्टिदैनन्,´ उनले भने।
दुर्गा प्रसाईंको आह्वानमा राजसंस्था पुनर्स्थापना गर्न भन्दै तीनकुने क्षेत्रमा भेला भएका राजावादी प्रदर्शनकारीहरूले पार्टी कार्यालय, निजी घर, सुपर मार्केट, जडिबुटी प्रशोधन केन्द्र र सरकारी गाडीमा आगजनी गरेका थिए।
